كشف الفنان بيومي فؤاد، عن نصيحة وجهها له الزعيم عادل إمام بشأن انتقاء الأعمال الفنية التي يشارك فيها.
نصيحة عادل إمام لـ بيومي فؤاد
وقال بيومي فؤاد، خلال لقائه ببرنامج “يحدث في مصر” الذي يقدمه الإعلامي شريف عامر بقناة “mbc مصر”:
“الزعيم عادل إمام قال لي خلي لأ في قوة أيوة مش أي حاجة توافق عليها،
ودي نصيحته ليَّ بس أنا مش عارف أقول لأ،
أقول لأ إزاي لواحد حلف لي إنه أخد قرض علشان يعمل فيلم ولو الفيلم ما اتعملش هيتخرب بيته،
فبقول له يلا وزي ما تيجي حتى لو هننزل الحفرة سوا واللي عايز يدفع يدفع ودا رزق عيالي واللي مش عايز يدفع يلا بقى هعمل إيه”.
فكر بيومي فؤاد
وتابع:”شيء جميل إنك تدخل فيلم فيه بيومي فؤاد ظاهر لمدة دقيقتين وتفتكره،
وبختار كتابة اسمي على حسب تعبي في الفيلم وما يشغلنيش ترتيب اسمي في تتر الفيلم”.
فيلم وش في وش
وأشار: “اعتذرت عن فيلم وش في وش 6 مرات،
لإن الدينا كانت عندي زحمة أوي وهما كانوا عايزين يبدأوا تصوير بدري شوية وأنا كنت مشغول
وفي النهاية اكتشفوا إني كنت أسهل واحد وافق على الفيلم”.
متعة بيومي فؤاد
كما وأضاف: “الحاجات اللي بتسعدني بشكل كبير إني أقعد على قهوة بلدي،
والدومينو أول حاجة بحطها في شنطة السفر وأنا رايح مسرح”.
في نفس اللقاء، قال الفنان بيومي فؤاد: “أنا تعبت من 4 شهور وأعلنت وقتها إني هريح شوية،
وهسافر وكم كبير من الناس كلموني يطمنوا عليَّ”.
رغبة بيومي فؤاد في خسارة الوزن
بينما أردف: “كنت مسافر للخارج علشان أخس لإني برفض العمليات وبخاف من البنج، بس ما سافرتش وبحاول أنزل وزني بالتدريج علشان بعاني من ألم في رجلي”.
طموح بيومي فؤاد
كما لفت بيومي فؤاد: “عمري ما حلمت باللي وصلت ليه، وطموحي عمره ما راح للحتة دي، أنا اشتهرت على كبر وما كنتش أحلم أبقيمشهور”.
كوميديا بيومي فؤاد
بينما تابع بيومى فؤاد: “أدعي أن الكوميديا لعبتي، ويقال إني شاطر فيها، كمصريين ربنا أعطانا منحة نقدر نقلب النكد لسعادة”.
أقرب دور لبيومي فؤاد
كما أشار: “أقرب الأدوار ليَّ شخصية عزيز في فيلم وش في وش، وهو أصعب عمل قدمته هذا الموسم مع إنه لوكيشن واحد، عيبي حاليًّا إني لا أنتقي أدواري وأنا طول عمري راضي باللي قسمه لي ربنا لإنه هو الأحسن ليَّ”.
