نشوى مصطفى تنعى زوجها.. نعت الفنانة نشوى مصطفى زوجها عبر صفحتها على موقع التواصل الاجتماعي الشهير “فيسبوك”.
نشوى مصطفى تنعى زوجها: 33 سنة محبة
وقالت نشوى مصطفى: «سترتني ربنا يسترك، وأكرمتني ربنا يكرمك، سيبت لي أجمل هدية ولادنا ربنا يهاديك بالفردوس الأعلى، 33 سنة ستر وكرم ومحبة ومودة ورحمة، علمتني إزاي أكون من المتصدقين».
وأضافت نشوى مصطفى في رسالتها لزوجها الراحل: «علمتني إزاي أكون دايماً في معية الله، علمتني إزاي تكون عزة النفس، علمتني إزاي أتسامح حتى مع اللي أذاني، علمتني إزاي أتوكل على الله في كل شؤوني، علمتني إزاي أكرم ضيفي، علمتني معنى التواضع مع عباد الله الضعفاء، يا نبيل الأخلاق يا ابن الأصل العالي، نسيت تعلمني إزاي أقدر أعيش من غير وجودك».
وتابعت: «مبعدناش عن بعض لحظة، 33 سنة ذكريات وحياة بحلوها ومرها، 33 سنة كنت خير زوج وخير أب، 33 سنة أكرمتني وسترتني وجبرت خاطري وربيت عيالنا أحسن تربية، ليه يا عماد سيبتني لوحدي كده – ما استاهلش منك تسيبني لوحدي، ده أنا مبعرفش أعمل حاجة في الدنيا، أنت اللي كنت بتعمل لنا كل حاجة».
اختتمت نشوى مصطفى رسالتها بالتعبير عن حزنها الشديد على فراق زوجها قائلة: «إنت اللي سندتني في كل ظروف حياتي الصعبة، في شدتي وفي مرضي شيلتني وطبطبت عليا، ياه على غلاوتك يا عشرة عمري، ياه على غلاوتك يا أبويا وأخويا وحبيبي وجوزي وابني، بموت يا عماد، بموت وأنت مش قدام عيني، هكمل إزاي يا رب من غيره، ادعو له بالرحمة وادعولي بالصبر وادعو لولادي بالصبر والثبات».
