علق الإعلامي عمرو أديب على الهجوم الحاد ضد الفنانة منى زكي بعد إطلاق بوستر مسلسلها الجديد “تحت الوصاية” المقرر عرضه في رمضان 2023.
وخلال حلقة الليلة من برنامجه “الحكاية” الذي يعرض عبر MBC مصر قال عمرو أديب “ظهرت منى زكي
بدون بهرجة أو مكياج في بوستر تحت الوصاية، والناس انتقدت شكل حواجبها عشان كثيفة هي لازم تطلع وحشة يعني؟
ولو طلعت حلوة وعاملة حواجبها هيتقال هو في محجبة هتعمل حواجبها كده، هو إيه شغل كيد النسا ده؟.
منى زكي
واستكمل عمرو أديب “منى زكي ست محترمة ومتجوزة راجل محترم، عمرنا ما سمعنا عنهم حاجة وحشة،
مفيش شيء سيئ يخلي التربص بمنى زكي كده، طبعا الحجاب زي أخلاقي واجتماعي
وأحترم أي فتاة وسيدة محجبة، لكن هو مفيش واحدة محجبة شريرة؟ لازم الدراما المبسترة تخلص”.
وأضاف: “الغريب في الأمر يا سادة إن غالبية اللي بيهاجموا منى ستات، هي في القصة سيدة مقهورة
عندها مشاكل، أومال لو طلعت محجبة وفي خصلة نازلة، كنتوا هتعملوا فيها إيه!”.
وتابع عمرو أديب ” ليه كل الناس بتمنع حد يقرب من المحجبات والشيوخ والأطباء، في سلبيات في المجتمع
زي كل المجتمعات .. زي كل شغلانة في حد كويس وحد وحش، يعني قضايا العيش والفراخ والأسعار
والوظائف والبلد والدنيا كل ده حلتوه، ومفيش غير مسلسل منى زكي!”.
منى زكي
واستكمل عمرو أديب: في ناس مستكترة على منى زكي تطلع تعمل دور بالحجاب، خفوا شوية على الست
واستنوا لما تشوفوا المسلسل،، هي غلطت في مين ولا ضايقت مين ولا عملت مشكلة مع مين؟، اهدوا شوية”.
منى زكي ممثلة جبارة
وواصل عمرو أديب: مسلسل نيوتن كان خارق للعادة وفاخر، ومنى زكي ممثلة جبارة، هو أنتم عاوزين نعملها مبسترة ودراما خالية الدسم،
ده إحنا بنشوف كل يوم قتلة في الأسعار والنصب والكذب وبنشوف نماذج لحاجات مشوهة وإلا كانت الدنيا حلوة.
بينما أثار بوستر مسلسل “تحت الوصاية” لمنى زكي جدلا كبيرا، بعدما ظهرت ترتدي الحجاب
كما غيرت رسمة حاجبيها وجعلتها عريضة وثقيلة، وبدأ الهجوم عليها من رواد مواقع التواصل،
متوقعين ظهورها في صورة المرأة المحجبة المظلومة والمقهورة، والتي ستواجه المجتمع وتتحرر وتخلع الحجاب بعد ذلك.
ومن دون التأكد من أي معلومات، بدأ البعض يتوقع أن المسلسل من تأليف إبراهيم عيسى كونه دائما يناقش قضايا تثير الجدل.
لكن الحقيقة أن مسلسل “تحت الوصاية” تأليف خالد وشيرين دياب، فيما يشارك إبراهيم عيسى بمسلسل آخر في رمضان هو “حضرة العمدة”.
و”تحت الوصاية” يتكون من 15 حلقة، بطولة منى زكى، ودياب، نسرين أمين رشدي الشامى، مها نصار،
خالد كمال، محمد عبد العظيم، تأليف خالد وشيرين دياب، وإخراج محمد شاكر خضير.
ويناقش مسلسل “تحت الوصاية” قضية اجتماعية تتعلق بتمكين المرأة وما تتعرض له النساء بعد وفاة الزوج ومعاناتها من المجلس الحسبي.
