صرح الماكيير أحمد مصطفى (ماكيير الإختيار 3 ) بدأت شغل ماكياج في الإعدادية مع خالي الماكيير الشهير أحمد مرتضى وحبيت الموضوع جدا، وتعاملت مع الماكيير محمد يوسف وكنا بنشتغل مع بعض بنظرة العين وبنرتاح جدا في التعامل مع بعض، جاء ذلك خلال حواره لبرنامج ” حالو معانا ” الذي يذاع علي نغم اف ام و البرنامج من تقديم الإعلامي كمال ماضي.
و أضاف أهم حاجه للماكيير إن عينه تصدق اللي بيشوفوا، ولو أنا كماكيير عملت شغلي كويس جدا والممثل غير قدير شغلي مش هيبان، و احب أشكر المخرج دكتور بيتر ميمي على ثقته في التعامل معي.
وعن تحدي الشخصيات في الإختيار 3 فكان بسبب المرحلة اللي كانت في 2012 ل 2013 لأن فيه ناس شكلها اتغير والمشاهد هيقارن وكان لازم نذاكر كويس وبدأنا نجيب صور وفيديوهات للشخصيات ، وبدأت أكتب الخطوات اللي هعملها لكل شخصية، والتحدي كان أكبر بالنسبة لي وهو طلب دكتور بيتر ميمي إنه مش عاوز مكياج أوفر ويكون بسيط، فقط روح الشخصية وعلى الممثل الأداء مع اللبس فكل حاجة تكمل بعض.
و وجه الشكر للنجم الكبير ياسر جلال إنه أبدى استعداد كبير لحلاقة الجبهة الأمامية والذقن في سبيل إن الشخصية تطلع صح ودي وفرت وقت وجهد كبير لينا وليه، و ياسر جلال كان بيحاول يمرن عضلات وجهه وهو بيعمل الميك اب فبتظهر خطوط من خلال ريأكشانات وشه وده ساعدنا جدا في تنفيذ الألوان على كل تفاصيل الوجه.
أما عن رد فعل الفنان ياسر جلال بعد ما شاف شكله ” اخدنا بالحضن أنا و الكوافير “، و من أهم مميزاته كفنان انه عاش الشخصية ومش بيقلدها.
وعن عبقرية خالد الصاوي فقال كانت متمثلة في طريقته وأداؤه فعمل للشخصية كيان وقربها للمشاهد، و حاليا بنغزل الذقن بدل من إننا نجيبها قطعة واحدة وده بيريح الممثل جدا في اداؤه وتعبيراته.
واختتم قائلا إحنا بلد كبيرة ومن أقدم الدول في صناعة السينما في العالم.
