مأساة جديدة على طريق الموت.. مصر تودع 18 فتاة من قرية السنباسة بالمنوفية

وجهت الإعلامية لميس الحديدي انتقادات لاذعة للوضع الحالي على الطريق الدائري الإقليمي، واصفة إياه بـ”طريق الموت” بعد الحادث الأليم الذي راح ضحيته 18 فتاة من قرية السنباسة بمركز أشمون بمحافظة المنوفية.

وخلال تقديمها برنامج “كلمة أخيرة” على قناة ON، عرضت الحديدي صورًا مؤثرة لجنازات الضحايا، قائلة: “الصورة دي مصر كلها مش هتنساها، ولو شفتها أول مرة هتحس إنها مرسومة، لكن للأسف دي وشوش ناس غلابة، أهالي 18 بنت في عمر الزهور، راحوا في حادث مأساوي.”

بنات العنب.. حلم تحسين الحياة ينتهي على الدائري الإقليمي

وأضافت لميس الحديدي: “بنات عمال تراحيل، كانوا بيشتغلوا في جمع العنب عشان يحسنوا ظروفهم بـ130 جنيه في اليوم، واحدة كانت بتحضر لجوازها، والتانية عاوزة تتجوز، والتالتة بتحلم تبقى مهندسة أو ممرضة، لكن الأمل مات مع البنات على طريق الموت، طريق الدائري الإقليمي.”

وأشارت إلى أن هذه الحوادث ليست جديدة على هذا الطريق، قائلة: “دي مش أول مرة، وشكلها مش هتبقى آخر مرة.. طريق الموت مش لقب إعلامي، ده الاسم اللي أهل المنوفية بيقولوه، وبيتشهدوا كل يوم وهما طالعين عليه، ونواب البرلمان بيقولوا إن فيه عشر حوادث يوميًا.”

ثلاث حوادث خلال 24 ساعة.. طريق الموت يحصد الأرواح

واستعرضت الحديدي تكرار الكوارث على نفس الطريق خلال ساعات قليلة، موضحة: “من امبارح لحد النهاردة ولسه دم البنات منشفش، ثلاث حوادث حصلت خلال 24 ساعة: عربية أمن مركزي اتقلبت وفيها مجندين، حادثة تانية نقل خبط الحاجز الفاصل، وتالتة تريلا خبطت أتوبيس، راح فيها السواق واتصاب 3 كمان.”

طريق بلا أمان.. وصيانة غائبة والكارتة شغالة

وانتقدت لميس الحديدي استمرار تشغيل بوابات الكارتة رغم سوء حالة الطريق، قائلة: “فيه إيه يا جماعة؟ ولسه طريق الموت مفتوح، ولسه الكارتة شغالة بتلم الفلوس، ومحدش عارف الفلوس دي بتروح فين؟ الطريق ده مهم، لكن الأهم منه حياة الناس.”

واختتمت الحديدي بالتأكيد على أن كافة “عناصر الموت” كانت متوفرة في هذا الحادث، موضحة: “الطريق فيه عيوب فنية ومشاكل من سنة فاتت، مفيش إشارات واضحة، وسائق تحت تأثير المخدرات، كل حاجة كانت جاهزة تحصد أرواح البنات.”