أعلن الفنان علاء مرسي عن حزنه من نفسه ومن باقي زملائه الفنانين بسبب قلة التواصل بينهم، مقارنة بعلاقتهم الوطيدة في الماضي.
وقال مرسي في لقائه مع الإعلامية إنجي أنور ببرنامج “فاكرني يا حظ” على إذاعة نغم FM على شبكة راديو النيل: كنا بنتجمع أنا وهنيدي والسقا ومحمود عبد المغني في مكتب المخرج سعيد حامد، وفجأة ما بقيناش بنتجمع زي الأول، ولا بنشوف بعض ولا نسأل عن بعض، حقيقي زعلان من نفسي ومن باقي زملائي.
وأضاف مرسي: “مفتقد السعادة من يوم رحيل علاء ولي الدين، لكن ذكراه عايشة معانا طول الوقت، وأشرف عبد الباقي بيجهز لعرض مبهر أبطاله من ذوي الهمم، وقولت له إنت هتخش الجنة بالعظمة اللي بتعملها دي، وبقول لكل الفنانين إنتوا أصحاب مسئولية، وبتمني كل الفنانين يعملوا زي أشرف عبد الباقي في مساعدة الشباب وأصحاب الهمم”.
وهاجم مرسي بعض الإعلاميين الموجودين علي الساحة لأن مخارج الألفاظ عندهم غير سليمة، فضلًا عن أسلوبهم في الحوار بشكل أقرب للغة الشارع قائلًا: “ماينفعش المذيعين يبسطوا لغتهم مع المستمع للغة الشارع، ومفيش حاجة اسمها “الجمهور عايز كده. أتمني دور الإعلام يرجع لقوته السابقة، والسوشيال ميديا نعمة حولناها لنقمة”.
وعن علاقته بالسوشيال ميديا قال: بتضايق من التعليقات اللي مش لطيفة، ومش من حق حد يعبر عن رأيه بصفاقة، وبناشد كل الناس خاصة الفنانين يدوا بلوك لأي حد بيكتب كومنت غير لائق.
