وجه الفنان رامي صبري رسالة إلى جمهوره ليعطيهم الأمل في تحقيق النجاح،
متذكرا بداياته الفنية عندما كان يغني في كورال وراء الفنان محمد الحلو.
ونشر رامي صبري صورة مقسمة لقسمين الأولى في بدايته وهو ضمن كورال فرقة محمد الحلو والثانية من آخر حفل أحياه في الكويت قبل أيام
وكتب: “صورة من 23 سنة تقريبا الفرق بينهم كبير جدا في الصورة اللي فوق كنت بشتغل كورال مع الفنان الكبير محمد الحلو
كما تابع رامي صبري “وكنت وقتها ببتدي اشتغل علشان أفهم يعني إيه مسرح وجمهور وإزاي اتعامل مع الناس في الشغل.
بينما أضاف وكنت دايما عارف إنها مرحلة (تعليمية) وهاتمشي مش هقف عندها علشان كده مكانش عندي طموح فيها.
فضلت اشتغل كورال مع معظم النجوم ساعتها لحد ما لحنت لفضل شاكر وعامر منيب الله يرحمه وبعدين شيرين أول ما ابتدت. وكل ده عارف إن هدفي لسه مجاش.
نصيحة الفنان رامي صبري لجمهوره
كما تابع رامي صبري: “الصورة اللي تحت بعد كل اللي فات والتعب والمجهود الكبير جدا ربنا كرمني كرم كبير جدا
وميزني من وسط فنانين كتيره جدا وخلاني أكون واحد من أهم نجوم العالم العربي، الموضوع كله صدقني في (الطموح)
لو إنت بتحب نفسك ومؤمن بنفسك وعندك الإصرار إنك هتوصل لمكان إنت مش فيه دلوقتي صدقني هتوصل بس تصدق نفسك
ومفيش حاجه اسمها (حظ) دي كلمه محصلتش معايا،
مع حبي للموسيقى وطموحي وأنا ماشي فيها في واحد معايا في نفس الصورتين
وهو أخي وصديق العمر والموزع الموسيقي وعازف الكيبورد الأستاذ محمد سمير.
هو كمان طموحه كبير جدا وابتدي معايا في الصورة اللي فوق لحد ما بقي أحد أهم موسيقيين مصر
وبيلعب مزيكا مع أهم نجوم عالمنا العربي، ولسه مكمل معايا من 23 سنه لحد الآن وهو مدير فرقتي الموسيقية”.
واختتم كلامه: “عاوز أقول في الآخر طموحك وحبك لنفسك هيوصلك ماترميش شماعة الظروف على نفسك
وتقول ظروفي وحظي وتدخل في مود مش هيوصلك لحاجة، هتوصل هتوصل صدقني اشتغل على نفسك أوي
وحط في نفسك إنك أهم واحد في العالم ولازم الناس كلها تعترف بيك، وأول ما هتنجح كله هيجري وراك ويسقف لك”.
يشار إلى أن رامي صبري أحيا حفلا غنائيا ضمن حفلات “موسم الكويت” بحضور جماهيري كبير.
وقدم رامي صبري مجموعة من أشهر أغانيه خلال الحفل منها “يمكن خير” و”خاصمت الشوارع” وغيرها من الأغنيات التي تفاعل معها الجمهور.
