عبير ابو زاهر

أعربت الفنانة نورين كريم عن أسفها لعدم وجود واسطة لها في المجال الفنى، مؤكدة أن المشوار طويل وصعب وقالت ” مع كل أسفي لنفسي وللناس إللي حبتني سامحوني غصب عني أنا تعبت”.

نورين كريم مليش واسطة

وأضافت في تدوينها لها عبر موقع التواصل الاجتماعي فيس بوك “صحيح مليش واسطه إني اشتغل غير موهبتي ، لكن ليا ربنا إللي شايف ومطلع إني مقصرتش لمه جاتلي الفرصه إني أثبت نفسي كممثله ، وبقه عندي ناس مؤمنه بيا وبتحبني وده من فضله عليا” .

نورين كريم طلب الشغل تقيل
وتابعت “تقيل علي الفنان إنه يطلب الشغل أو يقول إنه معندوش دخل يعيش منه غير الشغلانه دي ،، ولو حصل و بعت لأي حد ممكن يساعده وهو مش متعود إنه يعمل كده وممكن كمان ميتردش عليه ، بتبقي حالته النفسيه عامله إزاي”.

أنا إسمي نورين كريم من الإسماعيليه ، سيبت بلدي وأهلي وجيت للقاهره عشان أجري ورا حلمي إللي كنت فاكره إنه سهل لمجرد إني عندي موهبه الكل أشاد بيها،

لكن المشوار طويل وصعب مش زي ماكنت فاكره ، وخصوصا في بلد معرفش حد فيها،، ولا ليا سند ولاضهر غير ربنا إللي هو بس عارف أنا تعبت قد إيه ، وحرمت نفسي قد إيه ، وأصريت قد إيه إني أكمل رغم قله المعطيات،

عملت كل إللي عليا بشكل مشروع إني ألاقي شغل وتقريبا زي ناس كتير البيبان مقفله ، بكتب البوست ده وأنا في قمه حزني ويأسي من الشغلانه ، لكني مش يأسه من رحمه ربنا ،

يمكن حلمي مجرد سراب وأنا جريت وراه ، ويمكن كنت موهومه إني هقدر أثبت نفسي ،وجايز أكون غلط إني فضلت مكمله في الطريق ده لغايه دلوقتي ،،

مع كل أسفي لنفسي وللناس إللي حبتني سامحوني غصب عني أنا تعبت